தாம்பரம்,அக்.28- தாம்பரம் மாநகராட்சிக்குட்பட்ட 200 அடி ரேடியல் சாலை பகுதியில், சாலையோரப் பொது இடத்தில் குப்பைகளைக் கொட்டிய 2 லாரிகளுக்கு மொத்தம் ரூ.35,000 அபராதம் விதிக்கப்பட்டது. தாம்பரம் மாநகராட்சிப் பகுதிகளில் பொது இடங்களில் குப்பைகளைக் கொட்டுவதைத் தடுக்கும் வகையிலும், நகரின் தூய்மையைப் பாதுகாக்கும் நோக்கிலும் மாநகராட்சி நிர்வாகம் நடவடிக்கைகளை மேற்கொண்டு வருகிறது. குறிப்பாக, சாலையோரங்கள், காலி இடங்கள் உள்ளிட்ட பொது இடங்களில் குப்பைகளைக் கொட்டுவதால் சுற்றுச்சூழல் பாதிப்பு ஏற்படுவதுடன், சுகாதாரச் சீர்கேடும் உருவாகும் அபாயம் உள்ளது.
இந்நிலையில், 200 அடி ரேடியல் சாலை பகுதியில் பொது இடத்தில் குப்பைகளைக் கொட்டிய 2 லாரிகள் மீது மாநகராட்சி அதிகாரிகள் நடவடிக்கை எடுத்தனர். இதையடுத்து, அந்த லாரிகளுக்கு மொத்தம் ரூ.35,000 அபராதம் விதிக்கப்பட்டது. பொது இடங்களில் குப்பைகளைக் கொட்டுவதைத் தவிர்த்து, முறையாகக் கழிவுகளை அகற்ற வேண்டும் என்பதையும், மாநகராட்சியின் தூய்மைப் பணிகளுக்கு பொதுமக்களும் வணிக நிறுவனங்களும் ஒத்துழைப்பு அளிக்க வேண்டும் என்பதையும் இந்த நடவடிக்கை வலியுறுத்துகிறது.
