லட்சுமி சரவணகுமார் இயக்கத்தில், கதிர், திவ்யா பாரதி, பூர்ணிமா ரவி, போஸ் வெங்கட், சத்யா ஆகியோரின் நடிப்பில் பிரசாந்த் பாண்டியராஜ் வழங்கி ஜியோஹாட்ஸ்டார் ஒளிபரப்பும் தொடர் “லிங்கம்”. தென் தமிழகப் பின்னணியில், உண்மைச் சம்பவங்களை உத்வேகமாகக் கொண்டு ஒரு சாமானியன் எப்படி சூழ்நிலைகளால் தாதாவாக மாறுகிறான் என்பதைப் பேசும் விறுவிறுப்பான தொடர் ‘லிங்கம்’. கன்னியாகுமரி மாவட்டத்தைச் சேர்ந்த லிங்கம் (கதிர்) ஒரு திறமையான கபடி வீரர். காவல்துறை அதிகாரியாகி ஒரு அமைதியான வாழ்க்கையை வாழ வேண்டும் என்பதே அவரது லட்சியம். ஆனால், எதிர்பாராத ஒரு அசம்பாவிதமும், பழிவாங்கலும் அவரது கனவைச் சிதைக்கிறது. செய்யாத கொலைக் குற்றத்திற்காக சிறைக்குச் செல்லும் லிங்கம், அங்கு சந்திக்கும் காவல்துறை சித்திரவதைகளாலும் அவமானங்களாலும் முற்றிலுமாக மாறுகிறார். சிறையிலிருந்து வெளிவரும் லிங்கம், சாமியப்பன் மற்றும் செல்லப்பாண்டியன் ஆகியோரின் சட்டவிரோத மது வியாபார கும்பலுக்குள் நுழைகிறார். இறுதியில், சூழ்நிலைகளின் அழுத்தத்தால் கன்னியாகுமரியையே நடுங்க வைக்கும் மாபெரும் மனிதராக அவர் எப்படி உருவெடுக்கிறார் என்பதை 8 பிரிவுகளாக விறுவிறுப்பாக விவரிக்கிறது இந்தத் தொடர்.
கதிர்: ஒரு கபடி வீரராக, அமைதியான இளைஞனாகத் தொடங்கி, பின்னர் ஒரு முரட்டுத்தனமான ரவுடியாக மாறும் பாத்திரத்தில் கதிர் அசாத்தியமான நடிப்பை வெளிப்படுத்தியுள்ளார். அவரது உடல்மொழி மற்றும் கண்கள் காட்டும் ஆக்ரோஷம் தொடருக்குப் பெரும் பலம். பொன்மலர் கதாபாத்திரத்தில் வரும் திவ்யா பாரதி மற்றும் பூர்ணிமா ரவி தங்களுக்குக் கொடுக்கப்பட்ட பாத்திரங்களை நேர்த்தியாகச் செய்துள்ளனர். போஸ் வெங்கட் வில்லத்தனம் மற்றும் எதிமறை கதாபாத்திரங்களில் நடித்திருக்கும் நடிகர்கள் தென் தமிழகத்தின் மண் வாசனை மாறாத எதார்த்தமான நடிப்பை வழங்கியுள்ளனர். பிரசாந்த் பாண்டியராஜ் வழங்கும் இந்த தொடரை லட்சுமி சரவணகுமார் இயக்கியுள்ளார். தென் தமிழகத்தின் ரவுடியிசம், அரசியல் மற்றும் போலீஸ் அராஜகம் ஆகியவற்றை எந்தப் பூச்சுமின்றிக் காட்டியுள்ளார் இயக்குனர்.
விறுவிறுப்பான திரைக்கதை, எதார்த்தமான வசனங்கள் மற்றும் கதாபாத்திரங்களின் அசுர வளர்ச்சி. பின்னணி இசையும், ஒளிப்பதிவும் கடலோரப் பகுதியின் தீவிரத்தன்மையை அப்படியே கண்முன்னே நிறுத்துகின்றன. சில இடங்களில் வழக்கமான ரவுடிசம் கதைகளின் சாயல் தெரிந்தாலும், திரைக்கதையின் வேகம் அதை மறக்கடிக்கிறது. அளவுக்கு அதிகமான வன்முறைக் காட்சிகளை கொஞ்சம் தவிர்த்திருக்கலாம். ரவுடிசம் மற்றும் விறுவிறுப்பான கதைகளை விரும்பிப் பார்க்கும் ரசிகர்களுக்கு ஜியோஹாட்ஸ்டாரின் இந்த ‘லிங்கம்’ ஒரு சிறந்த படம்.
